Breviaar

 Apokalipse:

Apokalipse 1:1 NTHunsrik

[1] In tëm puch is kexrip was Yeesus Kristus reweleyert hot. Hërkot hot tëm tii reweleerung kep fer se tsayche fer sayn tiiner was klaych paseere mus. Kristus hot sayne ëngel kexikt tas, torich tëm, sayne tiiner Yohan tas tings se wise kreecht.

Apokalipse 1:2 NTHunsrik

[2] Yohan hot kesaat ales was eyer kesiin hot, un hier is was eyer kesaat hot iwer Hërkot sayn mensaaj un fon te woerheet woo Yeesus Kristus reweleyert hot.

Apokalipse 1:3-20 NTHunsrik

[3] Kliklich weyer tas puch leese tuut, un kliklich sin tii woo ti wërter fon tii profëtix mensaaj aan heere tuun un noo keen was in tëm puch kexrip is! Wayl ti tsayt is ticht woo tas tings ales paseere tuut. [4] Ich, Yohan, xraywe fer ti siwe khëriche woo in te prowins Aasia sin. Tas te knaate un friite aych kep wërt fon Hërkot, tee woo is, woo waar un woo khomt; un fon te siwe kayste woo foer sayne troon sin [5] un fon Yeesus Kristus, te leaale tsayer! Te is te eyerxte Soon, woo peleept kep waar un ti kheeniche fon te kans welt kowerneere tuut. Eyer liipt uns, un torich sayne toot am krayts hot eyer uns pefrayt fon unser sinte, [6] un hot fon uns en raych fon priister kemach tas mer sayne Hërkot un Fater tiiner khënte. Tas fer Yeesus Kristus ti kloor un ti macht kep wëre fer ale eewichkheet! Aamen! [7] Kukt! Eyer khomt mit te wolke! Al tuun em siin, sokaar tii woo em torich kextoch hon mit te xtech. Ale foleke fon te welt wëre krayche weche tëm. Kans sicher wërt es soo sin. Aamen! [8] Ich sin te eyerxte un te letste, saat te Hër Kot, te Almechtiche, woo is, woo waar un woo khomt. [9] Ich sin Yohan, ayre pruuter; un, fereenicht mit Yeesus, hale ich teel mit aych am Raych un aach an ti layte aus am hale mit ketult. Ich waar uf te insel Patmos, pis woo hiin ich kenom kep waar wayl ich Hërkot sayn mensaaj aan kesaat hon un ti woerheet woo Yeesus uns reweleyert hat. [10] Am taach fom Hër waar ich tomineyert kep fon Hërkot sayne Kayst un hon en xtarek xtim hinich mich keheyert, wii te klank fon en trompet, [11] woo mich saat: — Xrayp in en puch was tuu siin tuust un xik tas puch fer ti khëriche woo in tëne siwe xtet sin: Ëfesus, Smyrna, Përkamum, Tiatira, Sartes, Filatëlfia un Laotisëya. [12] Ich hon mich rom kewënt fer siin weyer mit mich am xpreche waar un hon siwe koltne khërtse xtëner kesiin. [13] In te mite fon tëne waar yemant eenlich wii en mann en tsaych am klayte woo pis an ti fiis kang waar un en koltne pant um ti prust. [14] Sayn hoer waare ways wii wol ore wii xnee, un sayn aue waare klënsich wii fayer. [15] Sayn fiis hon keklënst wii pronze refinierte im oofe un noochter poliert, un sayn xtim waar wii te ratau fon en kroos waser fal. [16] In te rechts hant hot eyer siwe xtërne fest kehal, un fon sayn munt is en xwaart raus khom, xaref ut ti tswaay sayte. Sayn kesicht hot keklënst wii ti mitachs sun. [17] Wan ich iiim kesiin hon, sin ich an sayn fiis kefal, wii toot. Awer, eyer hot sayn rechts hant iwer mich ketuun un saat: — Prauchst khee pang hon. Ich sin te Eyerxte un te Letste. [18] Ich sin tee woo leept. Ich waar toot, awer yets sin ich leewent fer ale eewichkheet. Ich hon autoriteet iwer te toot un iwer ti welt fon te toote. [19] Also, xrayp tas tings woo tuu siin tuust, soo fiil tas woo yets am paseere is soo wii tas woo xpeeter hiin paseere tuut. [20] Ti petaytung fon te siwe xtërne woo tuu in mayn rechts hant kesiin hast un fon te siwe koltne khërtse xtëner is tee: ti siwe xtërne sin ti ëngle fon te siwe khëriche, un ti siwe khërtse xtëner sin ti khëriche selepst.

Korintos 14,15: 1Korintios 14:15 NTHunsrik

[15] Was mache ich, tan? Ich beete mit mayne kayst, awer peete aach mit mayn intelijëns; ich wërt singe mit mayne kayst, awer singe aach mit mayn intelijëns. 

Magnificat: Lukas 1:46-47 NTHunsrik

[46] Tan saat Maria: [47] — Mayn seel ruuft em Hër sayn kroosheet aus. Mayne kayst is froo weche Hërkot, mayne Reter.

[48] Wayl Hërkot hot an mich ketënkt, sayn eenfach tiiner! Fon yets aan fort ruufe se mich al keseechent fraa,

49] wayl te Aler Mechtiche Kot hot krooses fer mich ketuun. Sayne naame is haylich,

50] un eyer tsaycht sayn kuutheet fer al tii woo em eere in te kanse xeneratsioone. [51] Hërkot heept sayn mechtich hant un ferxtraut ti xtolse mit tëne sayn kanse pleen. [52] Yaat mechtiche kheeniche fon sayn troone runer un tuut tii aarme in hooche xtele. [53] Eyer kept fiil fer tii woo hunger hon un xikt ti rayche fort mit te leere hënt.

54-55] Eyer hot kemach was eyer fer unsere foerkhomer ferxproch hat un hot es israelite folek, sayn tiiner, keholef. Hot sich erinert fer sayn kuutheet tsayche fer Aapraham un fer sayn kanse nookhomer, fer imer. [56] Maria is unkefeyer tray moonate pay Isabel keplip un tëm noo is es noch mool tsurik noo hëm kang.