Tswaay yunge mëner

 Tswaay yunge mëner hon uf te selwich farm kewoont wii tëne sayn fater kextorep is. Te leetich waar in sayn fater sayn haus keleept, un te ferhayrat hot neekst ticht kewoont. Tii hate een kroos rays lant un een keteelt xpaycher, un tii hon sich eenich kep fer mitsamer xafe un ales teele.

Tii hon tswaay hunert sache rays keërnt, ti helefte fer ti eyerxt un ti helefte fer ti anere, un soo, hon se tswaay xpaycher kepaut.

Tii hate een kuut ernte un sayn laate waare fol. Xpeeter mitaachs, te leetich pruuter hot aan kefang tenke tas tiise teel waar net richtich. Er hot ketënkt: "Ich sin leetich, un mayne pruuter is ferhayrat, mit en fraa un khiner. Tee praucht mee rays wii ich,

 wayl ich sin aleen." In tee nacht, is er

 uf kextii, is in sayn xpaycher kang,

 hot en sack rays kehool un hot tas in

 sayn pruuter sayn xpaycher kexmis.

Te pruuter is te neekste moynt uf kextii un hot aan kefang se tënke:

"Tiise teel is net kerecht, wayl ich sin ferhayrat, ich hon mayn fraa un khiner. Un tii wëre kroos kep un khëne mich helfe. Awer mayn arme pruuter, is aleen. Un wën eyer net ferhayrat kept, wërt nimant fer iim sin. Tas richtiche is tas eyer en teel kriit mee wii ich."

Tee is uf kextii, is in sayn xpaycher kang, hot en sack rays kehool un hot tas in sayn pruuter sayn xpaycher kexmis. Un soo hon se keleept: mit yeete ërnt, teet eene en tayl nëme fer te anere. Tii khonte ploos net ferxteen wii yeete eene imer ti selwich sum kriit hot.

Een xeen nacht, hon sayn biolookixe uer tsayte sich ferënert, un tii al sin in te selwich tsayt uf kextii un hon sich halpe weech ketrof. Tii hon sich kekukt. Tii hon te rays uf te ëyert kexmis, sich um keprung un kexraayt. Fon tëm taach aan, hon se een eensich xpaycher kepaut.